രോദനം

എന്റെ കണ്ണീരിനിപ്പോള്‍

എന്തു രുചിയാണ്?

കയ്‌പോ ചവര്‍പ്പോ അതോ മധുരമോ..

അറിയുന്നില്ല..

അടുക്കളയിലെ തീച്ചൂളയില്‍

വീണെന്റെ രസമുകുളങ്ങള്‍ നശിച്ചിരിക്കുന്നു.

എനിക്കു ചുറ്റുമിപ്പോള്‍

നിശബ്ദമാണ്.

ചോറില്‍ വീണ മുടിയെന്റെ

കേള്‍വിശക്തിയും തകര്‍ത്തു.

ഉമിനീരിനിപ്പോള്‍ ചോരയുടെ രുചി.

കണ്ണീരിനെയിപ്പോള്‍

ഉള്ളി മണക്കുന്നുണ്ടോ?

അറിയില്ല..

കെട്ടി നില്‍ക്കുന്ന കഫം

മൂക്കിനേയും പണിമുടക്കി

എനിക്കു പനിക്കുന്നുണ്ടോ?

അറിയുന്നില്ല...

എന്റെ മക്കളെവിടെ?

കാണുന്നില്ല..

കിടപ്പുമുറിയിലെ കാഴ്്ച

എന്റെ കണ്ണടപ്പിച്ചു.

തണുക്കുന്നുണ്ടോ എനിക്ക്??

അറിയുന്നു....

എനിക്ക് തണുക്കുന്നുണ്ട്..

കാരണം,

ഞാന്‍ മരിച്ചിരിക്കുന്നു..