കാത്തിരിപ്പ്

നിന്റെ സൗധത്തില്‍

ഞാനെത്തിച്ചേരുന്ന നിമിഷം

ഇനിയും അകലെയെന്നോ?

എനിക്കു പേടിയാകുന്നു.

എവിടെയാണ് പിഴച്ചത്?

കടന്നു പോയ കാറ്റിനും

നിന്റെ ഗന്ധം

കാത്തിരിപ്പു നീളുമ്പോഴേക്കും

എന്റ മണ്‍വീണ ചിതലെടുക്കും.

വയ്യ,

എനിക്കെന്റെ മണ്‍വീണ മീട്ടണം.

പക്ഷേ,

എനിക്കു ഭയമാകുന്നു.

എവിടെയാണിനി പിഴയ്ക്കുക?

[21.7.2009 ല്‍ മാധ്യമം ദിനപ്പത്രം ഗള്‍ഫ് എഡിഷനില്‍ പ്രസിദ്ധീകരിച്ചത്‌]

ഏകാകിനി

ചിന്തകളുടെ തടങ്കല്‍പ്പാളയത്തില്‍

നിന്നു പുറത്തുകടന്ന

തടവുകാരിയെപ്പോലെ

എനിക്കുമിപ്പോള്‍ അഭയമില്ലാതായിരിക്കുന്നു

കടപുഴകിവീണ മരങ്ങള്‍ക്കിടയില്‍

ഞാന്‍ വീണ്ടും തനിച്ച്‌

[ 21.7.2009 ല്‍ മാധ്യമം ദിനപ്പത്രം ഗള്‍ഫ് എഡിഷനില്‍ പ്രസിദ്ധീകരിച്ചത്‌]

കണക്കുകൂട്ടല്‍

വട്ടത്തിലും
നീളത്തിലും
കൂട്ടിയുംകുറച്ചും
കണക്കു കൂട്ടി.

പതുക്കെ

അടിവെച്ചടിവെച്ച്
ഉത്തരത്തില്‍ ചെന്ന്
തൂങ്ങിയാടി.

കണ്ണുകള്‍ തുറിച്ച്,
നാക്കു കടിച്ച്്,
ആഹാ!
താഴെ,
അലമുറയിടുന്നവര്‍ക്കിടയില്‍
കണ്ണും തള്ളിയിരുപ്പുണ്ട്
നീ.....
പതുക്കെ പറഞ്ഞു

ഇന്‍ഷൂറന്‍സ്
നിനക്കു തന്നെ.
**************
വട്ടത്തിലും
നീളത്തിലും
കൂട്ടിയുംകുറച്ചും
കണക്കു കൂട്ടി.
പിന്നെ,
പട്ടുചേല ചുറ്റി,
മുല്ലപ്പൂമാല ചൂടി,
പുറംവാതില്‍ ചാരി
തെരുവിലേക്ക്!
പുറത്ത്,
അന്തം വ്ിട്ട കണ്ണുകളുമായി
നിന്നു ഞാന്‍..
പ്ലസും മൈനസും
ഒമ്പതും ഒന്നും നാലും,
സ്ഥാനം തെറ്റിയ
അക്കങ്ങളും ചിഹ്നങ്ങളും
മുറ്റത്ത് ചിതറിക്കിടന്നു.